HİKMET-143
Behişt duzah talaşur talaşmakda beyân bar
Duzah aytur: “Men artuk mende Fir’avn Hâmân bar”
Behişt aytur: “Ne dersen sözni bilmey aytursan
Sende Fir’avn bolsa mende Yusuf Ken’ân bar”
Duzah aytur: “Men artuk bahil kullar mende bar
Bahillerning boynıda otluğ zencir-kişen bar”
Behişt aytur: “Men artuk peygamberler mende bar
Peygamberler aldıda kevser u hûr u ğılmân bar”
Duzah aytur: “Men artuk tersa, cuhûd mende bar
Cuhûd, tersâ aldıda türlüg azâb-suzân bar”
Behişt aytur: “Men artuk mü’min kullar mende bar
Mü’minlerni aldıda türlüg ni’met-elvan bar”
Duzah aytur: “Men artuk zâlim kullar mende bar
Zâlimlerge berürge zehr ü zakkûm çendân bar”
Behişt aytur: “Men artuk âlim kullar mende bar
Alimlerni könglide âyet hadis Kur’an bar”
Duzah aytur: “Men artuk münâfıklar mende bar
Münâfıklar boynıda otdın işkel-kişen bar”
Behişt aytur: “Men artuk zâkir kullar mende bar
Zâkirlerni könglide zikr ü fikr-i Sübhân bar”
Duzah aytur: “Men artuk binamazlar mende bar
Bi-namâzlar boynıda yılan birle çıyan bar”
Behişt aytur “Men artuk didâr körmek mende bar
Didârın körsetürge Rahim atlığ Rahmân bar”
Duzah anda tek turdı behişt özrini aydı
Kul Hâce Ahmed ne bildi bildürgüvçi Yezdân bar
