HİKMET-72
Eyâ dostlarım ölsem men bîlmem kî hâlîm ne bolur
Gorga kîrîb yatsam men bîlmem kî hâlîm ne bolur
Eltîp lahedge koysalar arkağa bakmay yansalar
Soruğ sevalîm sorsalar bîlmem kî hâlîm ne bolur
Kîrse karış atlığ yılan çolgansa tenge şul zamân
Kalmas bütün bîr üstühân bîlmem kî hâlîm ne bolur
Cümle yığılıp mör ü mâr etrafımda nîş urar
Müşkül erür pes kâr u bâr bîlmem kî hâlîm ne bolur
Hîç kelmedî mendîn sevâb anda ne bergümdür cevâb
Ger kılsalar yüz mîng azâb bîlmem kî hâlîm ne bolur
Bolsa kıyâmet künî hâzır bolur barçaları
Kılğan amellerîng kanı bîlmem kî hâlîm ne bolur
Ey Kul Ahmed sen bu kün kılğıl îbâdet tün ü kün
Demegîl ömrümdür uzun bîlmem kî hâlîm ne bolur
