HİKMET-80
Eyâ dostlar beyân eyley Hak Resul’dın
Ümmet bolsang iştib dürud aytıng dostlar
Ol “rahmeten li’l-âlemin” cüzü küldin
Ümmet bolsang iştib dürud aytıng dostlar
Hudâvendim atâ kıldı anga Mirâc
Rahmet bahrı tolup taşıp urdı mevvâc
Koydı anı başı üzre la-emrük tâc
Çın ümmetsen iştib dürud aytıng dostlar
Evvel Cibril alıp keldi anga burâk
Burâk minip kıldı Hazret ming tumturâk
Burâk uçup pervâz kıldı hind el-Irâk
Çın ümmetsen iştib dürud aytıng dostlar
Aksâ barıp tüşti körüng anda Server
Yığıldılar cümle rûhlar ol Peygamber
Mübârek bâd kıldı rûhlar anda yekser
Çın ümmetsen iştib dürûd aytıng dostlar
Cibril alıp ol Hazretni kıldı pervâz
Ol Sidretü’l-müntehâ’ğa yettiler bâz
Mustafâ’nı Cibril kıldı hub ser-efrâz
Çın ümmetsen iştib dürûd aytıng dostlar
Makâmıdın ötelmeyin Cibril kaldı
Cılavını ol Mikâil kelip aldı
Ahir demde ol Mikâil harıp kaldı
Çın ümmetsen iştib dürûd aytıng dostlar
Ol İsrâfil anı alıp uçtu cinân
Ol makâmda Resul kıldı aceb cevlân
Ol hem kaldı makâmıda kılıp efğan
Çın ümmetsen iştib dürud aytıng dostlar
Arşka karab kadem koydı Resulullâh
Naleynini salay dedi Hak Mustafa
Nidâ keldi naleyn birle sen koyğıl ha
Çın ümmetsen iştib dürûd aytıng dostlar
Hak sarıdın nidâ keldi “Erini meni”
“Ey Habibim manga karib kelgil beri
Mahrem kılay hâs sırrımğa İmdi seni…”
Çın ümmetsen iştib dürûd aytıng dostlar
Hakk’a karap koydı kadem Resûlullâh
Hakk’dın özge hiç kim yoktur anda hemrâh
Mundağ makâm hiç kimge yok vallâh bi’llâh
Çın ümmetsen iştib dürûd aytıng dostlar
Çın ümmetsen bu sözlerni hüb bilip al
Uşbu sözler hâs ümmetke mânend-i bal
Münâfıkka yakmas bu söz kelgey melâl
Çın ümmetsen iştib dürûd aytıng dostlar
Münafıklar şek keltürüb boldı merdud
Tangla duzah dimâğıdın çıkar bil dûd
Songra kılğan peşimândın sanga ne sûd
Çın ümmetsen iştib dürûd aytıng dostlar
Mustafâ’nı mirâcığa salğıl kulak
Kim işitse köngli bolğay hub suvdın ak
Çın ümmetsen iştip yığla misl-i bulak
Çın ümmetsen iştib dürud aytıng dostlar
Hudâ aydı “Mihmân bolup kelding manga
Kança bolsa hâcetingni aytğıl manga
Kılıp hoşnûd hâcetingni berey sanga
Çın ümmetsen iştib dürûd aytıng dostlar
Resul aydı “Tileğenim âsi ümmet
Belâğatdın kırk yaşını kılğıl rahmet
Ey Hudayâ sendin rahmet mendin şefkat
Çın ümmetsen iştib dürüd aytıng dostlar
Tilegening kabûl kıldım yâ Hak Resûl
Sen aytganıng kabûl kıldım bolma melül
Köp köp tile hâcetingni kılay kabûl
Çın ümmetsen iştib dürûd aytıng dostlar
Kırkdın arı ellig yaşnı kıldım taleb
Bi-kes yetim yığlab keldim sanga karab
Közüm tiktim yâ İlahi sanga yığlap
Çın ümmetsen iştib dürud aytıng dostlar
Ellig yaşnı berdim sanga yâ Mustafa
Kaytıp tile men erürmen hâcet-revâ
Köprak tile her ne deseng berey sanga
Çın ümmetsen iştib dürud aytıng dostlar
Yâ İlâhi altmış yaşnı aytdım sanga
Sen tüvânâ men nâ-tüvân keldim sanga
Boyun sunup keldim seni dergâhınga
Çın ümmetsen iştib dürud aytıng dostlar
Hudâ aydı hâcetingni aytdıng manga
Hoşnud bolğıl emdi mendin yâ Mustafa
Men râzimen sen hem mendin bolğıl rızâ
Çın ümmetsen iştib dürûd aytıng dostlar
Resûl aydı emdi tiley yetmiş yaşnı
Gam lâyığa batıp kalğan aralaşnı
Ümmetim dep men içmedim toyup aşnı
Çın ümmetsen iştib dürud aytıng dostlar
Yetmiş yaşnıng havâlesin kılğıl manga
Kıyâmet kün rahmetimni saçay anga
Könglüng tinsün inâyetim emdi sanga
Çın ümmetsen iştib dürûd aytıng dostlar
Yetmiş yıldur manga bende sanga ümmet
Zen ü ferzend üçün çekken renc ü külfet
Ol bendemge men bermesmen aslâ zahmet
Çın ümmetsen iştib dürud aytıng dostlar
Yetmiş seksen toksan yaşka yetse bendem
Keçip anı günâhını kılğum adem
Ümmetingni gamı ketsün bolğıl bi-gam
Çın ümmetsen iştib dürud aytıng dostlar
Kul karısa Hâce berür hatt-ı berât
Bendem berse men bermesem manga uyat
Ey habibim hoşnud sen bolğıl şâd
Çın ümmetsen iştib dürûd aytıng dostlar
Ey birâder murik sözi yalğan aytmas
Dini süstrak münâfıklar neler demes
Ol ezeldin tire-bahtdur özge kelmes
Çın ümmetsen iştib dürud aytıng dostlar
Ey birâder münâfıkka bolma ülfet
Kim ülfetdür başı üzre yüz ming külfet
Başdın ayak munâfıknı ziyân zahmet
Çın ümmetsen iştib dürud aytıng dostlar
Hikmet kıldı mirâc sözin Kul Hâce Ahmed
Şükür Allah Mustafâ’ğa kıldı ferzend
Arslan Babam hurmâ berip kıldı hursend
Çın ümmetsen iştib dürûd aytıng dostlar
