HİKMET-90
Bizdin selâm dostlarğa taleb yolın koymasun
Didâr taleb kılsalar hergiz gâfil bolmasun
Gâfil tapmas Hak yolın anda tapmaslar orun
İçi taşı küyüben seherlerde yatmasun
Yâdı birle bolsalar didâr ârzû kılsalar
Her çend hârlık körseler köngül özge bolmasun
Aşıklarğa dünyâda hârlık-zârlık melâmet
Melâmetsiz mihnetsiz âşıkmen dep aytmasun
Şeriatda tecriddür dünyâsını terk etmek
Terk etmeyin dünyanı Hakk’nı süydüm demesün
Tarikatda ten-cânın terk etmek müşküldür
Terk etmeyin ten-cânın tecrid boldum demesün
Hakikatda harâmdur bir Hüdâdın özgesi
Andağ bolmay âşıklar didâr ârzu kılmasun
Andağ Resûl Mustafa dünyâ mâlın süymedi
Ümmet bolsang Resûl’ğa dünyâ mâlın süymesün
Miskin Ahmed Yesevi selâm aytdı dostlarğa
Uşbu sözning ma’nâsın tâlib bolsa anglasun
