HİKMET-94
Hû halkası kuruldı ey dervişler kelingler
Hak sofrası yayıldı andın uluş alınglar
Kâl ilmini okuban hâl ilmiğe yetiben
Yoklık içre batıban barlıklardan alınglar
Yırtıp şefkat perdesin tilep didâr vadesin
Açıp köngül didesin müşâhede kılınglar
Hû erresin alıban nefs başığa salıban
Tüni küni tâlibler cânnı kurbân kılınglar
Halka içre Hû dengiz ışk otığa yanıngız
Ten-cân birle tâlipler tekbir başlap aytınglar
Hû – Hû teyu zâr ingrep Hû demekde manâ bar
Didârıdın ümidvâr rahmetidin alınglar
Kul Hâce Ahmed kul bolğan yol üstide kül bolğan
Tâliblerğe mül bolğan andın ibret alınglar
