Diller aceb hayrân olur
Esrâr-ı zikru’llâh ile
Yollar beğim âsân olur
Âsâr-ı zikru’llâh ile
Nefsin hevâsından kesil
Zikr eyle Hakk’ı muttasıl
Saykallanır mir’ât-ı dil
Tekrâr-ı zikru’llâh ile
Ger ister isen kurb-ı Hak
Al ehl-i irfândan sebak
Geldi zuhûra her varak
Eşcâr-ı zikru’llâh ile
Ref’ olsa zulmânî hicâb
Dilden giderdi ıztırâb
Yap yap gönül kasrını yap
Mi’mâr-ı zikru’llâh ile
Zikri bulup habl-i metîn
Muhkem tutar ehl-i yakîn
Dâ’im eder i’lâ-yı dîn
İzhâr-i zikru’llâh ile
İsterse ger kalbin safâ
Zikr eyle Hakk’ı dâ’imâ
Bîmâr olan bulur şifâ
Tîmâr-ı zikru’llâh ile
Dilden kederler dûr olur
Mahzûn olan mesrûr olur
Zulmet Hüdâyî nûr olur
Envâr-ı zikru’llâh ile
